Verhoale in et-veluws dialect: Hoastege spoed

Oh, dat het ze niet van een vreemde zei moeder ik heur et verhoal vertelde over woar ik deze week an et wark was.

Heur moeder was net zo vrogger, die scheet as ze op et land an 't wark was ...pprrrrt... zo effe achter de mestpluus en je mos d'r ok niet peroengelek veur de gezellegheid komme want dan kos je geliek meehelpe.

Ik had heur net et verhoal verteld van hoe et doar toeging en hoe beduusd ik was over et roetsj-roetsj-wark van Mientje, dat ze zo vlug was dat ze de stofzuuger al in de kast had toe ie nog noabromde, 't was een ouwe stofzuuger mar toch.

Mientje had 's marges effe achter me an e'zeuge toe ik kloar was met schuure, roetsj, kledder kloar, trok uut de veerte de stekker uut et stopcontact, snoet d'r in, slang d'r bie, en in de kast met dat ding.

En zo waare d'r wel meer dinge op te neume woar ik beduust noar e'keeke had, wat een snelheid had dat mins.

Mar et ging ok wel es mis.

Et was een mooie haarfstdag en poar daage loater, van die daage die d'r veural op et platte land zo mooi uutzien, of messchien mark je et op et platteland wel beeter.

De boome begonne te verkleure, et koore sting goudgeel op et land, een iezeg mooie blauwe lucht d'r boove en Mientje mos effe in Niekark een poar boodschappe hoale en dat dee'j ze gauw effe met de auto want dat scheut lekker op.

Ze was d'r inderdoad zo weer en ik zag d'r an komme met kloar geweld de loan op, noe et leste bochtje nog, en doar ging et mis.

Veur ik in de goate had wat d'r gebeurde ging ze rechtdeur et hegje et kooreveld in.

Wat was d'r noe gebeurd? Mos ik d'r heen? um te helpe messchien, loat ik in ieder geval effe kieke docht ik en zo vun ik Mientje met een groote handtas op schoot en een kartonne deus woar de boodschappe half uuthinge noast heur en ze zei: Das me noe nog nooit overkomme, ik prebeer altied alles zo economisch meugelijk te doen, dus ik doacht net, ik het oardeg de gang d'r in, die auto rolt wel duer tot achter et huus dus truk ik vast de sleutels dr uut en toe ik die sleutels in m'n tas stopte vleug de auto op et stuurslot en ik dus dwars deur de heg et koore in.

Hier, zet jie die handtas effe in de geut, dan zeuk ik Henk effe, die moet de trekker d'r mar effe achter zette en de auto weer op de weg sleupe.

Hoastege spoed is niet altied goed docht ik toe ik met een groote handtas over et arf liep.