Verhoale in et Veluws dialect: Verkeersexame

Foto:

Heela Hopsassa ’t is in de maand van mei jaja, heurde ik een vrouw die lekker in de hof beezeg was zinge, en behalve dat ieder voegeltsje dan een ei lei’j, zag ik in et 1 uur Joernoal dat et vandaag veur groep 7 en 8 weer verkeersexame was.

Dat bestoat al ruum 90 joar, dus ik het et ok nog mee e’maakt.

Wat ik me bie zo’n verkeersexame zowat hoenderd joar trug mos veurstelle weet ik niet, hoe je veileg de stroat moet oversteeke, dus met je mandje met eiere uutkieke dat je niet deur kar met peerd wier overree’je? Vrogger was dat exame in de hoogste kas van de lêêgere school, de 6e klas heette dat toedertied Vandaag he’n ze theorie, dus volgende week zu’n we wel weer heele groepe buute zien fietse

Et is goed dat zo’n verkeersexame bestoat al zulle kiendeere die doar vandaag en volgende week an mee doen d’r eige veurloopeg nie an de reegels houwe weet ik uut ervoaring. Veural dat jonge grut wat net van de lêêgere school komt en noar een hoogere, en veerder weg e’leege school goat, denkt dat et heele fietspad veur hunzelf is, ze fietse woar et niet mag, liefst met z’n drieën of viere noast mekoar, over stoepe, geeve gien richting an enz… Ze zei’je d’r bie dat de verantwoording ok gedeeltelek bie de ouwers ,lag mar doar hei’j je niks an. Voaders en moeders met kiendere op de fiets of op hun eige fietesje d’r noast rie’je je teege et verkeer in van de stoep, zo’n kiend weet loater nie beeter.

Afijn, ik docht weer trug an de tied toe wuullie verkeersexame hadde.

Herinner me gien Oranje hesjes met nummers d’r op zoas teegewooreg et geval is ,die kwaame pas generoasies loater, alle meesters en juffe wisse wie wie was, doar ha’n ze gien rugnummers veur nodeg. Een ander groot verschil was dat d’r in die tied mar af en toe een auto deur oens buurtschap kwam, dus je fietste je roendje, stak de stroat over woar dat van je verwacht wier, en was kloar.

Niet veur Bert de Leeuw

Ik sting achter hum te wachtte um te loate zien hoe ik de Barneveldseweg (nog klinkers in die tied) oover zou steeke. Zo recht meugelek ha’n we e’leerd, zodat je zo kort meugelek op die gevoarleke stroat was. Bert de Leeuw wachtte en wachtte tot de meester vreug woarum hie nie overstak. Noe was Bert in oenze ooge een biezoender kiend umdat hie, veur hie bie oens op school kwam, in et Weste van et land op een “vrieje school” of zo e’zeete had. Dat gaf nogal es verboasde blikke as hie z’n eige niet gedreug zoas wuullie allemoal, niet noar de meester luusterde en vaak teegedroads was

Veurbeeldsje: As iemand hum de weg noar Barreveld vreug lei’j hie dat niet kort en bondeg uut mar vreug woarum die persoon de weg noar Barreveld wou weete.
Ik was beniewd woar hie noe weer mee kwam.
Toe de meester dus vreug woarum hie niet de weg overstak zei hie: Ik wacht tot d’r verkeer an komt, dan kan ik loate zien hoe goed ik bin.

bijdrage van Ap uut Appel

Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? 
Like dan ook onze Facebookpagina, 
volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. 
Zijn telefoonnummer: 06-11087527, zijn mailadres: [email protected]

Reacties

X

Meld je nu aan voor onze nieuwsbrief
Aanmelden

Cookieinstellingen