Verhoale in et Veluws dialect: Niekark zoemer 1976

Foto:

De eerste keer dat ik ze teege kwam zaate ze allebei te briezele an de keuketavel en al gauw ha’k deur woar et over ging, over hoe hun ouweluu et in hun kop e’hoald ha’n huulie kiendere zukke ouwerwetse naame te geeve…

De eene heette Trui, de aare Trien.

Vandaag waare ze beeter te spreeke

D’r goat niks boove et Noordzeestrand, en ok al woene we hier vlak an et Randmeer, we mozze toch mar es noar Zandvoort zeije Trui en Trien teege mekoar.

Zo e’zeijd zo e’doan, en ik had et geluk et heele verhoal de volgende dag an te kunne heure.

Um d’r te komme was al een grootere klus e’weest dan ze e’docht ha’n want d’r stoat dan overal wel dat je hoenderd mag rieje mar zowat iedereen sting stil, en et was driet heet dus ze waare al bek-of toe ze d’r ankwaame.

Mar doar ha’n ze al op e’reekend in Zandvoort, al veur je op et strand bin keu je eerst effe rusteg koffie drinke, koffie met wat d’r bie, dat keu je wel gebruuke noar zon rit.

Veur ze et in de goate ha’n en dus veur ze goed en wel bedocht ha’n wat ze wouwe gebruuke sting d’r al een ober noast: Koffie? Ja, doar waare ze et over eens, mar wat in de gauwegheid d’r bie te bedenke?

Doe mien mar zon broodje as die minse doar he’n, Trien wees noar een taafeltsje iets bie huullie vandoan, ja, dat leek Trui ok wel wat, kloar dan, veuruut, doe mien dat ok mar.

Dat zal nie meevalle fluusterde de ober…

Woarum nie?, wouwe Trui en Truus weete

Wat die mensen bij de koffie eten hebben ze waarschijnlijk van thuis meegenomen, het staat niet op de kaart was het commentaar van de ober

Veuruut, dan alleen mar koffie en et strand op.

Minse kienders wat een volk, mar effe wat deurloope veur een rusteg plekje, en toe zaage ze et pas…..

Trui en Trien ha’n dus nog nie alles verteld bleek de volgende dag toe ze noa de middag met een Cherry op wat zaate te ginnegappe.

Meschien wouwe ze et eerst ok wel niet teege mien vertelle mar de “Pappegaaiesoep” maakte de tonge wat losser en toe kwam et hooge woord d’r uut

Ik mog et nie veerder vertelle want ze ha’n thuus niks teege hun manne verteld, mar ze waare gistere op et naakstrand e’weest

De man van Trui was et gisteravond wel op e’valle dat ze eegoal verkleurd was, gien streepe van badpak of bikini, ze had e’zeijt dat in Zandvoort de zon overal dwars deurheen ging en hie geleufde dat, zei ze, of et kon hum niks scheele docht ik. De man van Trien had et nie ees e’zien dus die hoefde gien uutlêêg te geeve

Mar veerders vreug ik, was et druk? was d’r veul te zien?

Ja, ’t was druk, wat wil je met dit weer, en d’r was veul te zien, en et was arg wenne e’weest zo’n eerstee keer naaktstrand.

Veur jullie zelf of veur wat je zag?

Veural wat we zaage zei Trui die nog mar es een Cherry inschonk en met de menuut loslippeger wier, ze waare slop van et lache van et strand e’komme.

Et zal d’r wel an ligge dat wuullie nie veul e’went bin mar we wisse soms nie woar we kieke mozze, veural vrouwe die een tampon gebruukte en doar toch naakt ginge ligge vunnen ze net “een wond met een lont”, en zoveul manne ha’n ze ok nog nooit bie mekoar e’zien, van Pinkeltsjes tot et leeke wel “lekke bande” zei Trien, en zo waare ze al giegelend en flink verbrand van et strand of e’komme.

Meschien hoeve we d’r binnekort niet zo veer meer veur te rieje want ze ha’n e’heurt of e’leeze dat d’r bie hun in de buurt ok zoiets zou komme, “Vleevo Netuur” of zoiets, eigelek hardstikke dichtbie Niekark in de polder.

En ja hoor, op 1 juli 1978 werd Flevo Natuur geopend.

bijdrage van Ap uut Appel

Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? 
Like dan ook onze Facebookpagina, 
volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. 
Zijn telefoonnummer: 06-11087527, zijn mailadres: [email protected]

Reacties

X

Meld je nu aan voor onze nieuwsbrief
Aanmelden

Cookieinstellingen