Op een mooie zoemerse dag zat ik op een bankje an de Appelsestroat in Appel effe uut te ruste van een wandeling.
Sommege minse noeme dit een uuthoek, dat mag, mar ik het zelde zon mooie uuthoek e’zien.
Dat komt vast ok dat ik d’r vandaag niet met de auto deurheen reej mar rustegan kuierde, af en toe iemand groette die in een tuin an et wark was of op een fiets veurbie kwam.
Ze waare arges an et hooie en ik bleef stil stoan um et ofgemeide gras te ruuke, et rook allemoal nog krek zoas in de tied dat ik hier opgreujde.
Fiesters zat vandaag.
Noe kwam d’r een oud boerenstel an, ruum in de tacheteg schatte ik, ze han allebei een elektriese fiets. Ik heurde nog net dat zie teege hum zei: och….d’r zit al iemand!
Geeft niks zei de boer, we goan d’r gewoon bie zitte.
Groot geliek docht ik, kom d’r bie zitte en roemde hun mooie fietse.
En dan maak je een proatje…
Woar kom jie vandoan?
Vanouds uut Appel, mar woen al weer heel wat joare in Groningen.
Dat vunne ze een heel eind weg, Och ja, docht ik, zo denke die ouwe minse d’r over, bin vast nog nooit zoveer weg e’weest…
En juullie?
Uut Voorthuuze
Nie veer van huus dus.
Woene juullie in een huus met een tuin?
Ja, we woene in een huus met een tuin, een beschutte tuin met een ouwerwetse heg d’r umheen, lekker in de lente en haarfst, te warm in de zoemer, dan fietse we liever, en, zei de boerin, as je d’r nie opuut goat zie of spreek je niemand en wuullie he’n mekoar nie veul meer te vertelle zon dag.
Ja, woar moet je et veerders over he’n?
Nog met vekansie e’weest? prebeerde ik
Ja, nog een weekje noar Oslo
Zo, dat leek me al heel wat veur die ouwe minsjes en dat zei ik ok
Nou, zei de boerin, vrogger hen we met een camper heel Europa deur e’reisd, wat hen we doar van genoote.
Tjonge, veur minse van die generoasie docht ik, knap heur.
Zeit die boer, ik moet eerlek zêêge dak doar meer van genoote het as van Thailand en Venezuela, mar op een zoemerese dag goat d’r niks boove dit mooie plekje woar we gewoon op oens fietsje heen kunne.
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
