Je bin d’r gek op of he’n d’r een hekel an
Ik blief d’r niet veur thuus…
Gezelleg die lange avonden denkt de één,
Wat noar vrog donker denkt de ander
Zo gezelleg die week veur Sienterkloas
Wat een stomme drukte in de stad
Wat geniet ik van die gezellege tied veur karst
Wat een rotweer en wat een kouwe drukte,
Eerst Sienterkloas, dan Karst en dan hei’je heelemoal an et eind van die moand as klap op de vuurpijl ok nog ouwejoarsdag en ouwejoarsaved
Proat me d’r niet van
Nou ja, ieder z’n meug
Je wor soms meewoareg an e’keeke as je niet van die gezellege moand houdt
Mar ik bin niet de eenege
Een weekje veur karst kwam ik een buurvrouw teege.
Ze was arg goed gemutst en vertelde blie: dit joar gien karstboom, femieliebezeuk of ander gedoe, wuullie goan marge met vekansie
Groot geliek mins zei ik en wenste heur een mooie tied
Op de dag dat ze zouwe goan kwam ik heur weer teege
Noe was ze zenewachteg toe ik vreug: Hoe loat vertrekke juullie?
We moe’n zo weg mar mien man zit nog bie de tandarts
Dat spreek je toch niet of net veur je met vekansie goat docht ik en vreug niesjiereg: Noodgeval?
Ja, zei ze, we zaatte een broodje te eete toe hie ineens markte dat z’n gouwe tand uut z’n kunstgebit was…
Fluitje van een cent zei ik, die lieme ze d’r zo weer in, kloar
Nou ja, we kunne ‘m niet terug viende, denk dat ie ‘m deur e’slikt het
Dan wordt et een ander verhoal mar die tandarts zal wel road weete liekt me en anders vertrek je zoender die gouwe tand, in elk vakansiehuusje stoat wel een vergiet
VERGIET?
Ja, vrogger of loater komt ie d’r wel weer uut en doar he’n ze ok tandartse die ‘m d’r wel weer in wille zette (al is et de vraag of je die gouwe tand dan nog in je moend wil) anders verkoop je ‘m , keu’je weer een poar keer van uut eete.
Gezellege daage en een mooie joarwisseling allemoal…
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
