Zie m’n halve leeve an me veurbie trekke.
Nee gien bijna dood ervaring, mar et wier tied veur et uutzeuke van een poar schoenedeuze vol ouwe foto’s, dus op een kouwe natte wientermiddag in m’n luie stoel, schoenedeuze um me heen op de groend moet et d’r mar es van komme. Bin d’r al eerder mee bezeg e’weest dus d’r zit al wat volgorde in, noe deurpakke en niet bie elke foto et verhoal d’r achter overdenke want dan komt et nooit of. Mar beginne met m’n jonge joare…
An e’ouwerd,
As je jong bin, en ik het et noe over een joar of 14, wil je alleen mar ouwer weeze, zo kos ik op die leeftied niet wachtte tot ik 16 zou worre want dan mog je brommer rie’je
Bin je eenmoal 16 wil je 18 weeze want dan mag je je riebewies hoale.
Zo ging dat teminste bie mien
Bin je eenmoal 18 dan wil je greeg 21 weeze umdat je dan (toedertied) volwasse bin, veur de wet dan, en dan alles mag wat je noe niet mag.
As je kiendere het krieg je meestal kleinkiendere en greu’j je d’r in mee (denk ik)
Weet niet woar precies et umslagpunt is, dat je wel kloar bin met ouwer worre, as je jongste kiend 40 is weet je dat je niet meer bie die generoasie hoort
Zowat iedereen (veural vrouwluu) weete nog krek dat ze bie de kassa ineens U e’neumd wiere: alst-U-blieft, wilt U de bon mee? Thuus in de spiegel zeuk je toch noar et eerste rimpeltsje
Ok veur meneere kan dat hard ankomme mar soms keu’j je d’r niet umheen
Zoas die keer dat wuullie in Valkenburg liepe en d’r iemand de hoek um kwam die me bekend veur kwam en ik heur bliekboar ok want noa effe goed kieke wisse we et zeeker
Tjee, Appie, jie hier? Ja, jie ok zo te zien. Ik mos 3 keer kieke zei ze en meteen doarop: jong wat bin jie an e’ ouwerd
Wat loater mos m’n riebewies vernieuwd worre, pasfoto’s loate maake in Niekark woar ik toe woende, ze beviele me heelemoal niet en de fotograaf kreeg de schuld, DUS mar noar Amersfoort woar ik de veurege keer pasfoto’s had loate maake, dat kunne ze doar veul beeter zei ik teege m’n buuurman (die bedenkelek keek)
Overstuur trug e’ reeje in et besef dat ik et met die ouwere kop moet doen.
Toe ik weer wat loater an de stroatkant in de tuinborder an ’t vreute was liep d’r een buurvrouw langs die zei: Je binneband komt d’r deur. dat ha’k nog nooit e’heurd en wis niet wat ze bedoelde. As je zo half kruupend veurover zit kriege minse een andere kiek op je bliekboar, et ging over et eerste kolae plekje op m’n heufd.
De leste keer bie et inchecken op een vliegveld kwam net noa de veilegheidscontrole een heele rie stjoewardessen en stjoewardjes veurbie. Ik sting d’r met afgezakte broek noar te kieke, et venijn zit bliekboar altied in m’n broekriem, sleutels en/of muntjes in m’n portemenee, dus ik had alle tied um te bekieke hoe behendeg hulie deur de controle ginge.
Wat een broekje dat stjoewardsje zei ik tegen P., zou hie al een riebewies he’n of zou z’n moeder hum noar et vliegveld e’brocht he’n?
ET WAS DE PILOOT
Ik had dus al een poar wieze lesse e’had, mar ja, bord veur je kop hé ?
Klap op de vuurpijl, et besef begint te komme:
Was een weekje bie vriende in Niekark die een viever in de tuin liete anleege
Je moe’n d’r effe heen loope en met die jonges proate zei m’n gastvrouw, één d’r van komt ok uut Appel
Nieschiereg as ik bin schiet ik klompe an en klos d’r effe heen
Klopt ja, alle drie de harde warkers kende et gebied woar ik vandoan kom en dan weet je wel wat de volgende vraag is:
WOAR BIN JIE D’R EEN VAN?
OJA?, ik mos effe denke
En je moeder: is dat een van Renseloar?
Jaja.
Oh mooi, dan weet ik weer wat veur vleis ik in de kuup het docht ik en zei:
Dan he’k met je moeder op school e’zeete, Teuntje van Renseloar toch?
Teuntje van Renseloar is mien OMA zei de knul
Ik kloste op te groote klompe terug noar huus..
Wat is d’r?
NIKS, ik weet weer bie welke generoatsie ik heur.
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
