Op huus an fietsend noa een cursus bie Huize De Brink (de ouwe huishoudschool) kreeg ik zin in een petatje en umda’k zowat langs een Snekbar ” Automatiek” op et Plein kwam fietste ik een stroatje um en bestelde een petat met majeneise.
Dat was in die tied zowat de eenege keus die je ha’n) petat zoender of petat met, niks petat Oorlog, Specioal of Joppiesaus en al die niemodische dingen.
Ging met m’n buit noar buute want ik wou d’r es lekker van geniete, en petat in de buutelucht smaakt echter.
Had nog mar een poar stukjes e’preufd toe d’r een bekende langs fietste
Ze stapte of veur een proatje.
Ik kos an heur zien dat ze ok wel een lekker frietje wou dus zei ik dat ze d’r best een poar mog pakke.
Meteen pakte ze een groote stengel petat, douwde die in de Majeneise, beet d’r een stukje of en begon met de rest van et frietje weer in de Majenese te reure.
Ik weet et wel, in lande woar ze hoengesnood he’n zeu’j je doar niemand over heure mar ik kan doar slecht teege.
Vrogger neumde ze me doarum ok wel “Trekneus”.
Mar zêêg es eerlek, oenfris en harstikke oenhygiënisch toch?
Et is nie meteen dat ik een trekneus bin, et is deur prefesser Paul Dawson (een voedingsbioloog) beweeze dat d’r een groot riezieko an zit an twee keer dippe, zo keu’j je heel makkelek aare minse besmette met griep, een infeksie, een verkoudheid of zelfs een maagdarmoentsteking.
Ik at veerder zoender de majeneise te gebruuke en docht an een vies verhoal wat vrogger te pas en te oenpas vertelde.
Op zondag aate wuullie thuus veur et gemak een eenpansgerecht tusse de middag, een heele moaltied kreeg je nooit op tied op tafel as je pas um half twoalf uut de kark kwam.
Dat was vaak riestepap, mar ok allerlei andere pappe, al of niet met krente, reziene en aare toevoeginge.
We kreege dat op en bord e’schept, gooide d’r witte, bruune of bastertsuuker overheen en begozze te eete.
As z’r iets in zat wat we echt niet luste of wat we niet wegkreege mogge we dat van moeder op de rand van oens bord lêêge.
Voader vun dat groote oenzin en vertelde dan altied weer etzelfde verhoal.
Gien idee of et echt zo ging bie hun thuus vrogger mar hier komt et verhoal.
Vrogger aate ze bie hum ouweluu thuus op zondag met z’n alle uut één pan die in et midde van de tafel sting.
Ze waarkte et eete wat ze uut die pan schepte vork veur vork of lepel noa lepel zoender borde te gebruuke noar binne.
Vrogger kozze minse bliekboar beeter teege allerlei bacteriën, en in die tied was je as groot gezin meschien wel blie dat d’r genog te eete was en liet je et wel uut je heufd um d’r iets wat he niet lekker vun d’r uut te lêêge, al viel et veur dat d’r iets in zat wat niet weg te kriege was zoender d’r in te stikke.
As opa dat bie één van de kiendere zag zei hie: Spuug mar uut, dat krieg je niet weg, ik het et ok al drie keer in m’n moend e’had.
Dan was mien eetlust gauw weg.
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
