As ik in Niekark bin wil ik altied effe over et karkhof en zeker vandaag, voader zou 109 e’worre weeze as ie nog e’leefd had.
We mozze de auto wat veerderop parkeere umdat ze op de oprit van de begraafploats zo op et eerste gezicht een graf veur een reus an et graave waare.
Et bleek loater met groote buize te maake he’n woarvan wuullie niet begreepe woar et veur diende dus sleuge we an et roaje: as et dan gien enorm gat veur een reus was? zouwe ze Wifi kriege? rioleering of???
Beetje oeneerbiedeg mar we waare nog nie kloar met fataseere…
Eerst effe bie mien ouweluu kieke en noe we d’r toch bin meteen effe kieke hoe et graf van Gaart d’r bie ligt, en loate we ok effe bie mien ouwers kieke zei de vriendin woar ik mee was.
Oendertusse kwaame we nog veul graave teege van minse die we van vrogger kende wat weer heele verhoale opleeverde:
Kiek hier, Hannes, ok al een heele tied dood, “die het niet goed op e’past” zoas ze dat hier zêêge (zeup nogal hefteg). Toe Hannes en Kee 25 joar e’trouwt waare kwam P nog met et idee um ze een privé-glasbak te geeve.
En kiek, hier Oart, die zat bie mien in de klas, enz….
Toe we bie de ouwere graave kwaame, jeetje Willem, ken jie die nog van de kroeg? Die is al langer dood dan hie e’leeft het.
En hier, Tante Oartsje, had vuuftien kiendere mar was altied de hort op, ik het ze nie op m’n rug, zei ze as je noar heur drukke huushouwe vroeg…
Toe ze ouwer wier kreeg ze allerlei klachte mar overal was een mouw an te passe. Hoaruutval? Hup een pruuk, een kunstgebit, een nieuwe heup, gloaze oog en steunzoole.
Toe de halve femielie bie mekoar kwam um een kedootje veur heur verjoardag te bedenke en ze d’r mar niet uutkwaanme riep één van de kiendere: wat dochtte juullie van een combinatietang?
Zo bin je veur je et weet weer een poar ur veerder.
Trug noar de auto, en toe die toch met de neus de goeie kant opsting zei de vriendin die mee was, loate we effe bie m’n zus an rieje, juulie he’n mekoar al joare niet e’zien.
Zo e’zeijd zo e’doan
Zus was thuus, gezelleg, hoe komme juulie hier verzeild?
Effe over et karkhof e’weest en we he’n zowat iedereen weer e’had.
Ja, begraave of cremeere? en nog veul meer nieuwerwetse meugelekheede wiere bespreuke, mar weet jie al wat je zou wille?
Ik bin d’r zelf nog niet uut zei ze mar mien man wil veur de Leeuwe e’worpe worde!
We he’n meteen koarte besteld.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
