Deur een speuling van et lot, nou ja…,of deur een moeder die d’r eige de wet niet liet veurschrieve heet ik Aalbert en gien Lubbert.
Ik bin vernoemd noar mien opa van moeders kant, en dat was schand want zo heurde et niet in die tied in Niekark en umstreeke.
Wie docht je wel niet dat je was um et an te durve et anders te doen dan de rest?
Verschillende femielieleeje naame et moeder nogal kwoalek mar doar mos je bie heur niet mee ankomme. As andere d’r eige an argerde, oocchh…dan ha’n die stumpers een probleem, moeder niet.
D’r waare in die tied nogal wat geschreeve en oengeschreeve regels woar je je as fatsoenlek burger an heurde te houwe bie et vernoeme, en dat begos zo:
As oudste jong heurde je vernoemd te worre noar de voader van je voader, was et eenste kiend een dêêretje dan arfde et de naam van moeders moeder.
Et tweede jongetje heurde noar moeders voader te heette, de tweede dêêre noar voaders moeder.
De darde zoon noar z’n oom, voaders oudste breur, de darde dochter noar heur tante, moeders oudste zus, enz, enz,enz.
Et kan handeg weeze dat vernoeme. Of je et leuk viend of niet, et bespoart een hoop gepieker over een orriesjieneele naam veur je kiend.
Teegewooreg beginnen ze net noa dat ze uut e’vunne he’n dat ze overtied bin al met in naamboeke neuze, ze zeuke d’r eige suf op namen-sites, d’r is weekeleks overlêêg of gedoe tusse de nieuwe voader en moeder over de juuste naam, je zou zowat zêêge: dan mar gien kiend.
In de joare zeuveteg van de veurege eeuw raakte bie veul minse et vernoeme uut, mar of we d’r op veuruut ginge?
Toe kreeg je zukke niejerwetse naame dat de opa’s en oma’s van die kleinkiendere dat nie ees uut kozze spreeke. Heurde regelmoateg: vanmiddag komt Sgantalletje weer, of, ik pas vandaag op Zoetje.
Wuullie waare deegeleke veurnaame e’went zoas: Peter, Gerrit, Jan of Arie veur jonges, en Gerrie, Toos, Bep, Greet of Fien veur meide.
De veurnaame paste bie de achternaame, of kwam dat deurdat we dat noe eenmoal e’went waare?
Zêêg noe zelf, Bertha van de Akker…, woar denk je an? Een deegeleke dêêre die d’r eige wel redt liekt me, Abaylin, Esmee of Zoë van den Akker moet ik aan wenne. Die achternaam blieft deegelek, en doar moet die veurnaam wel een beetje bie passe anders veult et e’kneusd.
Frans of Mike de Boer prima mar Xess of Grosvenor de Boer?
Bie een neefje zat een kiend in de klas die Jarig heette, die was elke dag Jarig.
Op ’t oogeblik zie je de wat stoerdere gewoone naame weer trug komme, Bram, Tim of Thijs heur je weer vaker veur jonges, Sara, Emma of Noortje heur je weer meer veur dêêres.
Elk joar wordt d’r deur de sociale verzekeringsbank, de instantie die de kienderbieslag uutkeert, een liest met de meest veurkommende naame van dat joar gepresenteerd.
Woar je ok op moet lette is dat afkortinge, dus de beginletters van de veurnaam niet vleuke bie de achternaam.
Ik bedoel: heet je kiend gien Willem Cornelis as z’n achternaam Boender is, of Wil die vanachtere Helmes heet. En dat is niet alleen met naame van kiendere of minse zo, zo, heette de K.atholieke U.niversiteit T.ilburg mar 6 weeke zo, et wier al gauw: Katholieke Universiteit Brabant.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
