Et waare reurege tie’je, de zesteg en zeuveteger joare van de veurege eeuw.
Weet niet woar je heede ten daage teegenan loopt as je tieners an et opvoede bin,….mar op de Veluwe van de joare zesteg zal et wel net zo meujlek en frustrerend e’weest he’n dan teegewooreg.
Alleen ginge ze d’r toe anders mee um .
Reeken mar dat et veur oenze ouwers niet altied eeve makkelek was al ha’n ze één ding veur op 2023…
Teegewooreg moe’n ouwers tot in de treure uutlêêge woarum WEL en woarum NIET, in oenze tiener-tied was et:” DOARUM NIET” of “UMDAT IK ET ZÊÊG”, BASTA, en op één of ander menier dêê je et doar mar mee.
Lulleg heur, dan woen je doar zo mooi en rusteg dat je denkt dat et altied zo zal goan as in de veurege generoasies mar dan krieg je dat gezeik van kiendere die een meujleke leeftied kriege en op de Mulo oender invloed stoan van adderengebroed uut de groote stad.
Doardeur wille ze niemodische dinge zoas: een rok-zoadel.
Hoe hoal je et in je harsus.
De ‘emancipatie’ (zowat gien één wis wat dat woord krek beduude) was nog niet echt deur e’drunge mar rammelde an de poorte van de Niekarkse buutegebiede zoas een eeuw doarveur de spoeke en de witte wieve dee’je
Kleine veranderinge viele niet teege te houwe en de volgende genroasie liet op een strabante menier van z’n eige heure.
Zo wou een dêêre woar ik in oenze tienertied mee noar school fietste grêêg een Rokzoadel, dus thuus zeure um een Rokzoadel.
Um de boel kracht bie te zetten zei ze: met die rooie rok op de fiets is et net of ik een lul tusse me beene het…
Heur voader zei alleen mar: Nou, dat wil je toch altied?
D’r kwam veurloopeg gien Rokzoal.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
