In die tied zag je niet veul dit soort alleenstoande vrouwlu, in de stad meschien wel, mar hier buute-of was et effe wenne
Wat je hier wel ha’n waare ouwe vriesters die bie d’r ouweluu waare blieve woene, die broachte ze dan netjes an ’t eind zoas dat hier heet, en bleeve dan gewoon op de ouwe stee woene
Mar bie Annie was dat aarst
Annie was hier in de buurt één van de eerste “gewoon” alleenstoande vrouw die alleen in een boederiete woende zoender dat ze d’r ouwers an ’t eind e’brocht had, en et mos e’zeid, ’t was een flink wief, arges begin darteg, en je zag d’r altied in spiekerbroek, schaapwolle trui en steevege bargschoene, ’s wienters had ze over die schaapewolle trui een zwarte leere jas.
Ok veur een alleenstoand mins komt de tied van oenderhoud an je huus en al leek ze me flink zat um ’t zelf te doen, ze zei dat ze doar gien tied veur had en zodoende had ze de hulp van et schilders / behangers bedriefje in e’roepe woar ik toe veur waarkte.
We ha’n mekoar wel es e’zien mar nooit e’spreuke, ’t was meer da’k d’r wel es achter in de kroeg had zien stoan op zoaterdagavund noa et vrie danse bie Vliek in die tied, en zo kreege we de proat over uutgoan en woarum ze altied op de fiets ging.
Met de auto leek me een stuk makkeleker want et was nog een oardeg eind woarvan een flink stuk deur een doenker bosgebied
Mar Annie vun dat et veur heur veul gevoarleker was om met de auto te goan, want zei ze, as ze toch uutging wou ze ‘m goed raake, doarum was ze me meschien wel op e’valle, van stijldanse hield ze niet, ze sting altied weust te schudde met een groepje andere minse, teegeworeg heet dat geleuf ik ‘hedbenge’ of zo, zwoar vermeujend leek me, en dan nog dat heele eind noar huus fietse.
‘k Bin hier ’s marges al es tusse de bloemkoole wakker e’worre zei ze, ‘k was zo blie da’k d’r was, temenste op m’n eige groend, da’k eerst mar effe teege et bankje achter in de hof ging zitte, en deur de warmte en de biertsjes was ik zo meu e’worre da’k vast gewoon opziet e’valle bin, en zo wier ik ’s marges wakker van de zon in m’n nek.
Da’s in deze tied van et joar gelukkeg vrog genog dus niemand in de buurt het et e’zien en noe ik me d’r niet meer veur schaam is et eigelek wel leuk um te vertelle.
Bliekboar ging ze niet alleen op zoaterdagavund uut mar ok wel deur de weeks want ze begos vanmarge meteen te vraage of ik eerst de veurdeur af wou schilderen wan die mos an et eind van de middag weer dicht kunne,
En weer kwam et gesprek op dat eind fietse, je heurt van die roare verhoale teegewooreg, mar doar had ze wat op e’vunne…
Ik bin niet gauw bang zei Annie en as ik ’s nachs alleen terugfiets en d’r goat een auto achter me rieje dan fiets ik met me beene wied en tuf een vette rochel van me of, dan denke ze dat ze met een an’ esjeute vent van doen he’n en rieje ze wel veerder
En mocht dat niet zo weeze, en ze wille wat van me en ik wil dat niet liekt me dat beroerder veur heulie dan veur mien.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
