Van trouwe krieg je altied spiet zei de vervelende man die noast me liep teege me…
Woar bemeu’j je je mee docht ik, mar ik zei: vertel es?
Nou, as je et verkeerd doet krieg je spiet dat je et e’doan het, en as je een goed huuwelijk he’n krieg je spiet dat je et niet eerder e’doan he’n
Was effe bie et gemeentehuus goan kieke umdat d’r een kennis ging trouwe en docht op dat soort momente altied terug an et verhoal wat een goeie man me joare e’leeje vertelde
Die beste man was heel wat joare BABS (Buutegewoon Ambtenoar van de Burgerlijke stand) e’weest en verbond poare in de echt in et Niekarks Gemeentehuus.
Vaak verliep zo’n korte plechtegheid zoender veul gedoe al viel d’r soms een getuuge flauw of waare de ringe kwiet, mar doar ging et hum nie um.
Tot zo’n beetje de zeuventeger joare van de veurege eeuw was et, as je ging trouwe, gewoonte eerst effe noar et Gemeentehuus te goan um je botterbriefje te hoale en meteen doarnoa noar de kark. De karkelijke inzeegening was veur veul echtpoare in die tied belangrieker dan de korte ceremonie in et Gemeentehuus.
Trouwes, je MOS eerst veur de wet trouwe wou je doarnoa je huuwelijk loate inzeegene in een kark, andersum mog nie, zie artiekel 1:68 van et Burgerlijke wetboek.
As je noe nie van plan was in een kark te trouwe was et Gemeentehuus et hoogtepunt van de dag en was je gauw kloar.
Dat moet leuker kunne docht de goeie man en ging an de slag…
In z’n vrieje tied op de fiets noar et buutegebied van Niekark want hie had bedocht dat as je d’r iets meer van wou maake, je meer informatie mos he’n um een uutgebreidere speech te maake, dus niet alleen van te veure een gesprekje met et toekomstege bruidspoar, mar ok een gesprek met de respecieveleke ouwers/schoonouwers en meschien wisse breus en zusse ok nog wel iets leuks te vertelle woar hie wat an had.
Dat was eens mar nooit meer, vertelde hie me.
Bie de ouwers van de bruid wier hie hartelek oentvange, toe ze heurde woar hie veur kwam liep de boer weg mar de boerin was mans genog um te vertelle met wat een briezel van een vent die dêêre straks zou goan trouwe, zo’n oenbenullege kwakbol, et heele wiekend hangt die groote lobbes op de bank, te lui dat ie de dag an ziet, enz…
Je begriept et al, ok bie de ouwers van de toekomstege bruidegom ha’n ze weineg op met dat verwende nest, woorde as: oenneuzel toater en totobel kwaame veurbie,…hie bedankte de minse veur et gesprek en fietste terug noar huus.
Je bin nooit zo goed as op je begrafenis, en nooit zo slecht as op je trouwdag
Dan kos je beeter op et Gemeentehuus een uutgebreid algemeen praotje houwe…
Zo woarlek helpe mij…
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
