Verhoale in et Veluws dialect: Uutje d’r bie?

Foto:

50 joar trug op de markt in Niekark

Vriedagnoamiddag noa et wark nog effe over de mart in Niekark um een mekreeltsje of een poendje poaling te hoale veur moeder die doar zo gek op is.

Vriedagmiddag was nie et eind van de warkweek, in die tied warkte je op zoaterdagmarge ok nog.

As ik me goed herinner ha’n we toe een vierenveerteg uurege warkweek. Ik bleef een beetje opziet van de viskraam stoan umda’k nog effe mos prakkezeere woar ik heur et meest blie mee kos maake.

Mekreel was altie goed, mar poaling vun ze uk lekker, al zei ze d’r altied bie: -Je moe’n d’r mar nie an denke dat et liekekruupers bin-, mar at ze geliek met huud en hoar op, d’r zouwe wel niet zoveul lieke meer in de Zuujerzee ligge.

’t Wier heel wat aarst, en dat kwam deur een ouwer echtpoar wat ik veur liet goan.

Zie, een klein wiefje met een gries knotje, hie een lange slungelege koalende kêêrl, met in ze eene hand een zakketas en in de aare hand een bos bloeme.

Hie hoefde niks, doarum sting hie bliekboar een stap achter heur met ze hande vol, mar d’r kwam nog meer bie.

’t Vrouwtje bestelde en poar Hollandse nieje.
Veur thuus? Vreug de visvrouw. Nee, meteen op’eete.
Uutje d’r bie?, ja, uutje d’r bie.
En doar sting ze dan met d’r vettege pepiertsje met een poar Hollandse nieje, de rillinge leupe me over de rug. Ik bin nie zo’n rauwe viseeter.

Ze beduude heur man opziet van de kraam te komme stoan, en ik bleef nog effe kieke um te zien hoe ze die dinge, die ik nooit zou opeete, deur d’r keel zou loate glieje.
En et wier nog oengeleufeleker as ik docht.

Ze sting al as een reiger met d’r heufd noar achtere toe heur bliekboar wat te binne scheut, en zei: Jan, hou me gebit es effe vast.

En ja hoor, de zakketas wier tusse ze beene op de groend e’zet, de bos bloeme oender z’n arm, hie huil z’n geups op, en doar kwam ’t gebit, woarnoa de Hollandse nieje rap in de spelonk verdweene.

‘k Het die dag ok mar Hollandse nieje e’kocht, mar et verhoal pas verteld toe moeder ze op had.

bijdrage van Ap uut Appel

Aanmelden nieuwsbrief
Cookieinstellingen