In verscheie lande um oens heen zoas: Zwitserland, Spanje en Zweede is een fietshelm verplicht as je met een fiets de weg op goat.
Hier ribbezakke verkeersveilegheid-organiesoasies over de vraag of dat in oens land ok zou moette?
Et zou kunne helpe teege et greujend aantal oengelukke met fietsers, (want d’r valt nogal es een dooie bie) en as je dat kun veurkomme is d’r wat veur te zêêge.
Ik weet nie wa’k d’r van moet zêêge, mar het zelf gien zin in een helm op de fiets, bin de leste 60 jaor zelde met m’n fiets e’valle, en ze kunne wel an’t zeure blieve, nog effe en 65 plussers moete verplicht ziewieltsjes, zeik een eind op.
In sommege lande zitte heele femielies zoender helm op een moter, trouwes, 50 joar trug was dat hier bie oens ok heel gebruukelek.
Een vrouw vertelde me es dat ze samen met heur breurtje, voader en moeder op de brommer zat, voader reej, breurtje wier veurop op de tank e’zet, zie tusse voader en moeder in, en moeder truk de kienderwaage achter de bromer an. In een bocht ging et nie heelemoal zoas et mos, moeder had effe gien grip en de kienderwaage met de baby scheut een slootje in.
Veur zoveer ik begreep is’t allemoal goed e’komme, en die baby zal (net as de rest) wel gien helm op e’had he’n.
Buute dat, dan moete kleine kiendere in bad, op de wipkiep of de schommel ok een helm op.
Et liekt me et best dat iedereen veurzichteg is en uutkiekt en veerders zelf mar moet uutviende wat et beste veur hum, heur of de kiendere is
Een vriendin vertelde dat ze op heur Mobylette (plm. 1970) op weg was van Appel noar ’t station in Niekark toe halverwege heur brommer et begaf.
Gouw trug noar huus om een fiets te pakke, dan mar een trein loater.
Al een poar keer docht ik, wat kieke minse toch noar me.
Pas toe ze een poar kielemeeter veerderop bie et Tuincentrum van Daniëls was riepe jonges die doar in de tuin an et wark waare: Bang dat de bom valt?
Toe begreep ze dat d’r iets nie klopte. Ze veulde an heur heufd, en ja hoor, ze had heur bromfietshelm nog op.
Dat moet in die tied uutzoenderlek uut e’zien he’n, een jonge meid op een opoefiets met een bromfietshelm op.
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
