Hier ligt vanof gisteremarge snee’j.
Een beetje
As et alleen die snee’j was ging et nog wel mar d’r kwam iezel bie en noe is et op ploatse zo glad dat ze op stroat schoatse.
Dat dee’j me denke an de wienter van 1962/1963
Snee’j, snee’j, snee’j…
Wat vun ik dat vrogger leuk.
As kiend zag je alleen de leuke dinge d’r van.
In de wienter van 62 op 63 was de snee’j an beide kante van de anderhalve meeter hooge tuinheg zo op ‘e steuve dat we d’r gewoon overheen kozze loope.
As we niet met de fiets noar school kozze ginge we loope met de kiendere uut de buurt. sneeuwballe gooie, sneeuwpoppe maake, op oendiepe slootjes deur et ies zakke en koud en vies thuus komme.
Wat hadde wuullie een makkeleke moeder docht ik loater nog vaak.
We kwaame met leerze vol snee’j en smurrie in huus, wiere veur de warme kachel uut e’ schut, van schoon en dreug goed veurzien, kreege warme suukeloai, warmde weer op en ginge schoatse op De Veentjes, De Koeplas of in de Bunt.
Schoatse ha’n we thuus een beetje e’ leert achter een ouwe stoel op de bevreure varkesloop
Dan vreur et woater van de modderege varkesloop in een poar nachte dicht.
Op tweede karstdag van dat joar, 1962, kreege we bezeuk van een vriendin van moeder en heur kiendere die vanof heur trouwe in een land woende woar et nooit snee’jde. Noa joare brocht ze weer es een karst in Holland deur, en veur de kiendere (en heurzelf ok, denk ik) had ze e’hoopt dat ze in ieder geval sneeuw zouwe zien.
En zo geschiedde: de kiendere wisse niet wat ze zaage toe de snee’j noar beneede kwam dwarrele en hoe dat in z’n wark ging
Minse, toch nog een witte karst.
Binne de kortste keere was zoveer je kos kieke alles bedekt met een mooi wit laagje.
Iezeg mooi um te zien zei’je moeder en heur vriendin, mar wat zal dat straks weer een rotzooi geeve bie opdooi, noe eerst mar van et mooie d’r van geniete.
De kiendere, die ok wel begreepe dat et niet eeuweg bleef ligge vreuge tot m’n verboazing:
WANNEER GOAT ET WEER UMHOOG?
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
