Verhoale in et Veluws dialect: Tradiesjoneele Veluwse verjoardag

Met alles wat d'r bie heurt, zoas ik vrogger e'went was, met breurs, zusse, ooms, tantes van beide kante, opa's en opoe's veur zoveer nog in leeve, vriende, buure, kennese en veerders alles wat los in en uut loopt.

Ik was et een beeejte oentwent markte ik, die echte Veluuwse verjoardaage met de heele femielie, de leste keer dat we dat meemaakte was bie mien ouweluu thuus en die bin al joare dood.

Mar noe we hier bin op et verjoardagsfeesje van een vriendin die 65 wordt keek ik d'r met beduusdheid noar mar begos et binne de kortste keere weer leuk te viene.

En hoe goat dat dan?

Zoas et heurt netuurlek, de kêêls zitte allemoal bie mekoar lekker stoer te proate over voetballe, autoo's en pooletiek, de vrouwluu over breipetroone en de nieuwste soaps-series.

Ze zien mien as een oenzijdeg beesje die je zoender gedoe tusse de manne of vrouwegroepjes kun ploatse, nou, de joarege zette me d'r krek tusse in.

Dat kwam goed uut veur mien, vanof hier kos ik zien wat d'r in de heele woenkamer veurviel en ik had zicht op de deur woar iedereen deur noar binne kwam.

Zo zag ik dat de joarege deur iedereen hartelek e'fieliesiteerd wier, dat ze van de meeste drie steevege smokkers kreeg, een kedootje en goeie wense veur de kommende tied.

Doarnoa ginge de gaste veerder de heert op um hun fieliecietoasieroendje te maake.

Sommege deeje dat in een halve menuut, (hoi, jie ok fielesteert hé) andere waare toe ik vertruk nog beezeg, die ha'n met veul minse wat bie te proate.

Et oentging me niet dat sommege minse bliejer waare mekoar te zien en andere weer minder blie as ze zaage wie d'r binnekwam

Hier en doar wier warm umhelst, een ander mos et met een handje doen en sommege sleuge mekoar botweg over bie et begroete.

Dat valt niet eens zo op in groote femieliegezelschappe, met de één hei'j je noe eenmoal meer as met de ander, en as je dan toch heurt te komme umdat et je zus of zwager's verjoardag is keu'j je dat ok zo anpakke inploats van niet te komme, gewoon negeere wie je niet wil zien.

Bie mien twiefelde verschillende minse mar ik was in een goeie buu die dag en truk ze gewoon noar me toe, zoene zouwe ze, van jong tot oud.

Noe viel et geroezemoes stil, opoe kwam d'r in, veureg joar weeduwe e'worre. Ik had heur sinds die tied niet meer e'zien, ze zag d'r goed uut.

Ok zie ging selectief te wark met begroete

Niemand maakte ze eige d'r druk um zo te zien.

Ze keek woar ze kos goan zitte en zag bliekboar meteen iemand die nog "bie e'proat" mos worre over het leste zwoare joar, plofte d'r noast en begos te Jeremieëre: Tjonge tjôônge jônge, was het mien man e'leeje veur hie uuteindeleks stierf, iezeg maager e'worre, hie had enorme pien en kos zelf niks meer, ALLES kwam op mien neer.

Iedereen op de heert luusterde tot degeene die gien hand e'kreege had et bliekboar zat wier en net te luud zei: Ik het teege de kiendere e'zeiijd, zo gauw ik me reet nie meer kan ofveege magge juulie me ofmaake!

Iedereen stil...,tot ze weer veurzichteg begonne te proate.

Ze beug noar me toe en zei: teegewooreg denk ik doar anders over heur.

Zeeker umda'j je ouwer wordt zei ik.

Nee, mar pas het een mins bie mn moeder in de stroat allebei heur polse e'breuke, dus die kan d'r reet ok nie ofveege mar ik bin bang dat die jonges (heur kiendere) d'r eige doar niks van antrekke en d'r eige an de afspraak houwe.

We moe'n et d'r mar gauw es over he'n en een andere afspraak maake anders kan et nog wel es noar met me ofloope.