Verhoale in et Veluws dialect: Geiteneukers
Teegewooreg keu'j je et woord neuke gerust hardop zêêge, teminste, dat doe ik wel as et zo uutkomt, mar dat was in de joare zesteg van de veurege eeuw wel anders
Op de Veluwe teminste.
Dat leeverde soms roare toestande en hard gelag op as je toch iets wou vertelle wat met seks temaake had mar et woord neuke nie wou gebruuke.
Et volgende wier me verteld deur een struuse goedlachse boerin van in de vuufteg die Import-Niekarkse was, ok al woende ze hier al veul langer dan ik oud was, ze bleef import.
Et is schandoaleg zei ze es teege me hoe hier die boere as halve wilde met mekoar umgoan.
Oh?.
Nou ja, um een veurbeeld te geeve: hoe hoal je et in je harsus um te vraage of Greet al drachteg is, of ze et over een koe of een varken he'n. Je kun toch fatsoenlek ofwachtte tot ze je dat vertelle as et zoveer is, of je vraagt of Greet "die een half joar e'leeje met heur jong e'trouwd was" al in verwachting is messchien, mar niet: is Greet al drachteg?
Open over seks proate kwam niet veur. Opoe van voaders kant zei: je hoef kiendere niet te leere vrieje en....dan neumde ze nog iets wat ik vergeete bin, meer wier d'r over seks niet e'zeijd. Et kwam d'r op neer dat je mar mos uutprebeere wat in je opkwam en je instinkte achternoa goan, dan kwam et vanzelf goed.
Ik vreug me wel es of of oenze ouwers doar meer van wisse of dat die ok mar an et uutprebeere e'sleuge waare?
Noe wou die boerin woar ik et net over had me iets heel serieus en tegeliek args vertelle zoender et woord neuke te gebruuke.
Dat ging zo: Ja, hoe za'k dat noe zêêge? Ik heurde dat die boer hier veur an de weg euh.....ja hoe zêêg je dat noe?.....Euh, zêêg mar dat ie met een koe noar bed ging!
Et was echt niet de bedoeling, ik prebeerde woarachteg nog een tel of wat neutroal te kieke mar barste al rap in oenbedoarlek lache uut, zag et veur me. Bedenk dan meteen wat een rotzooi dat geeft. De meeste boederieje hen een slaapkamer beneeje anders moet je d'r ok nog mee de trap op. Ik het zelde zo e'lache over zo'n ernsteg oenderwarp en dat kwam alleeneg mar um et woord neuke niet te hoeve gebruuke.
Vertelde et loater bie Obbes an een vriendin die net e'scheije was en me achteruutwiekend ankeek met een blik van krieg noe tiete. Een Amsterdamse campinggast die heurde woar wuullie et over ha'n zei heel biedehand: Ja, klopt, dat heet in de volksmoed emmeren! Ha'n die Veluwenoare ok weer wat e'leerd.
Mar emmere, hoezo emmere?
Simpel, die boere gebruuke een emmer um et met een koe te doen. Ik snapte et nog niet. Ohh....een umgekeerde emmer....um d'r bie te kunne. Huzaren dee'je et bliekboar op die menierr met hun merrie. HHMMM...mar ees in et woordeboek kieke. Mien Kramers woordeboek komt niet veerder dan zaaneke en zeure, dus Googelen. Meteen raak, klopt van die boere jong, de Huzaar en die emmer. Beestaliteit heet et, en et bin niet alleen keêls die d'r eige doar mee bezeg houwe, ok vrouwluu prebeere wel es een 'Lik-Lassie'.
Een geitehoeder die et met een geit doet het gien emmer nodeg.
Och toch, zag die pas geschei'je vriendin een beetje gelg wegtrekke dus wou ik weete of dit verhoal te arg e'weest was veur heur.
Nou nee, zei Connie, mar ik denk net: Gert het de hoend e'houwe, oooohh die arme Doesjka
Hier was et stukje eigelek kloar tot ik een poar weeke trug een ankondeging van een tilleviesie uutzending zag over seks met ezels in Colombia. Het de uutzending e'mist mar et zal wel zo'n beetje etzelfde e'weest he'n as een poar joar doarveur toe een Amerikoan een documentaire maakte over Donkey-seks: The most bizarre an obscure tradition in Colombia had ie et over.
Doarveur ha'k al verneume dat et in Australië krek andersum is. Vrouwluu moe'n doar uutkieke veur een hitsege kangoeroe die met z'n zwieperd veuruut vrouwe lasteg valt.
Meschien kan de partij veur de diere doar wat mee?
bijdrage van Ap uut Appel
