Bartha sting in de geutdeur te wachtte tot dikke Bep d’r op zou hoale veur de joarlekse bazar van de kark en ik zou die middag de geut witte mar dat zou eevewel wel deurgoan.
Ah, door heur ik et gerammel van de Ballebus (dikke Bep reej in een Dafje) en Bartha had net verteld dat ze heur zo noemde umdat d’r meer “Beppe” lid waare van de vrouwevereneging en umdat ze zo steeveg was netuurlek, en dat et Dafje Ballebus e’neumt wier umdat ie zo rammelde.
Ze had ok nog effe beschreeve hoe steeveg dekke Bep was en wat veur gevolge dat soms had.
Zo waare ze veureg joar op et joarlekse reisje van de vrouwevereneging arges heen e’weest woar je met zo’n dreihekje noar binne mos. Alleen uutzoenderleke moate mogge deur een groote deur mar veur dikke Bep was dat niet nodeg, docht ze, dus deej ze et koartsje in de gleuf, ’t dreihekje ze klik en dikke Bep zat d’r tusse, en goed ok, ze zat zo klem dat d’r een hieskroantje an te pas mos komme um heur d’r uut te kriege.
Bliekboar had dikke Bep niet alleen een uutzoenderlek figuur mar ok een biezoendere kiek op dinge
Zo heurde ik d’r nog net veur Bartha in de Ballebus zou stappe vraage: wis jie dat et huus van de klompemaker te koop stoat? En bin jie d’r wel es in e’weest?
Bartha was d’r wel es binne e’weest, niks biezoenders an, wel goed oenderhouwe, wat wou je d’r van weete dan? Wou jie doar woene?
Nee, mar dikke Bep was arg niesjiereg e’worre toe ze, de in heur ooge, biezoendere beschrieving van ’t huus in de krant e’leeze had, moeje kieke, ze vraage d’r nogal wat veur, mar et schient dan ok een biezoender huus te weeze, en ze pakte de krant d’r bie.
Veul geld veur een huus zo dicht an de stroat zei Bartha mar veerders zie ‘k d’r gien biezoenders an
Woar ik et meest niesjiereg noar bin zei dikke Bep is die Indische hal die d’r in schient te zitte, dat zou je zo an de buutekant niet zêêge, ’t liekt een heel gewoon Veluuws huus, dat moet je toch op e’valle weeze as jie d’r al es in e’weest bin?
D’r is me toedertied niks biezoenders op e’valle zei Bartha, loat es zien die krant, wies es an woar dat stoat: O noe begriep ik et, jie begriepe die ofkortinge verkeerd
Doar stoat: Ind: Hal, enz, met Ind bedoele ze indeling, platte groend en zo…
“k Wou d’r toch niet woene zei dikke Bep en met z’n beije wrunge ze d’r eige in de Ballebus en rammelde richting kark.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
