Uwe huisvrouw zal wezen als een vruchtbare wijnstok aan de zijden uws huizes, uwe kinderen als olijfplanten rondom uwe tafel.
Psalm 128 vers 3.
Halverweege et met steenpuin en ofgebreuke stukke betonmuur bie stukjes en beetjes verharde opriepad noar de boederie net buute Niekark hiel de boer die beezeg was de prikkeldroatvree te repereere me stoande.
Teminste, ik docht dat et de boer was woar ik noar toe mos, mar et bleek een “belangstellende” buurman te weeze die veuran et pad woende.
Moet jie doar de boel goan opknappe jong?, doar he’k van e’heurd teminste, mar ik kan je wel zêêge, wat je d’r ok doet, ’t blieft een rommeltsje doarzo.
Veerder zei buurman Wous: dat schient et lot van die minse te weeze mar veerder bin ze niet kwoad zei hie d’r geruststellend achteran, mar bar slorreg en poddereg, vanof et begin dat ze hier kwaame woene altied al e’weest en dat zal wel zo blieve dunkt me.
Toe wuullie darteg joar trug bie huullie brulloft waare ging et al mis, dominee’s las de trouwtekst al verkeerd veur, ’t mos weeze: uwe kiendere zulle as olijfplante an tafel zitte of zoiets mar de beste man zei: Juullie kiendere zulle as Olifante roend de tafel zitte, en hie het nog oardeg geliek e’kreege ok, mar doar goat et noe niet um, veerder bin et beste minse mar arg ruug, dat wou ik mar effe zêêge.
Nou, doar zag et al gauw noar uut, niet wat et wark betruf want dat liete ze wel an mien over, pas tusse de middag begon ik d’r goed zicht op te kriege.
In die tied was et heel gewoon dat je tusse de middag een “muisje” of een sneetje brood mee at bie de boere, en alleen as ik et heel zwoar niet vertrouwde zei ik da’k tusse de middag altied thuus ging eete.
In dit geval ging et um een sneetje brood, doar kos niet veul an mis goan, docht ik, dus scheuf ik ok mar an tafel.
Wil jie d’r een gebakke eitje bie? vreug de boerin. Ja, dat wou ik wel, en de boer ok dus doar kwam de koekepan
Bie mien ging et goed mar bie de boer viel ie deur een oenhandege meneuvre buute et bord en et hoendje had dat net iets eerder dan de boas in de goate dus was d’r al een hap of veur et gehavende eitje van et zeil e’schraapt wier mar de boer lei’j et op z’n gesmeerde sneetje brood en kauwde et gewoon op.
Noe was dat nog niks vergeleeke bie de verhoale die ik de daage doarop van de boerin te heure kreeg, zoas op een gegeeve mement midde in de warme zoemer in de hooibouw, zweetereg, dorsteg, warm en weineg doesse want marge wor je toch weer vies en je kun noe eenmoal niet an de gang blieve.
Op zo’n zweeterege avund kreup heur man noast heur in bed en ik zêêg nog teege hum: mar Bartus, jie doen met dit heete weer die dikke zwarte zokke toch wel uut in bed? Bartus zei: mins die he’k uut, zukke zwarte poote had ie, en dat was nog niet et argst, hie was niet van plan ze te wasse.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
