Verhoale in et-veluws dialect: Heilege
Vuufteg joar trug kwam et nog veul veur mar et begos minder te worre as et e'weest was, ok in Niekark en umgeeving, en volges mien maakt et teegewooreg heelemoal niks meer uut mar:
As je in die tied Hervormd was hoalde je et niet in je harsus bie niet Hervormde te koope, en as je van de "kleine kark" (Griffemeerd) was of Katteliek of nog wat aarst zocht je ok wel uut, of wier je wel veur e'schreeve, woar je mos koope of een behanger mos bestelle.
Wuullie ha'n weineg Kattelieke klante, en ik was dan ok niet arg van de gebruuke van die minse op de hoogte. Ok umdat wuullie d'r vrogger op school niet veul over heurde, ik zat toe der tied op de Hervormde Appelsche school woar gien Roemse opzaate want die ha'n hun eige school in Niekark.
Veerders ha'n we d'r ok nie veul mee te maake want d'r woende nie veul Kattelieke minse in oenze umgeeving en degeene die d'r woende waare we best mee mar we ginge d'r niet veul mee um. Zo ging dat in die tied
Juullie begriepe wel dat et veur mien effe wenne was toe ik in een Katteliek gezin "die et met dat soort dinge niet zo nauw naame" en net zo makkelek met een Gerifformeerde in zee ginge, an et behange ging.
Ik verboase me d'r over dat d'r zo weineg verschil in zat, goed, d'r wier een kruus e'sleuge veur et eete mar et smaakte niet aarst dan bie andere klante.
Woar ik wel beduusd over was was dat ze veur alle gelegenheede een Heilege schenen te he'n.
Doar kwam ik in de loop van de middag achter toe Marie d'r bril kwiet was en wel tien menuute deur et huus liep te banjere en roepe: Heilege Antonius woar is m'n bril???
Mar et warkte, ze vun um wel op 't uuteind.
bijdrage van Ap uut Appel
