Verhoale in et Veluws dialect: Liever de veearts
Boeren zijn gezonder dan werknemers met een ander beroep las ik in "een papieren krant" dus al een tijdje geleden...
Boere zie je weineg bie hun huusdokter en ze he'n minder te kampe met psychische klachte.
Ze kunne zo noe en dan best een arts gebruuke mar de boere die ik ken he'n vaak gien hooge pet op van dokters
Het wel vaker heure zeege: As d'r hier wat an scheelt bel ik liever de veearts.
Noe ging et een poar keer um een veearts die ik ken en kos me best veurstelle dat je één en aar eerst met heur overlei as ze d'r toch was.
Et was zo'n veearts woar je veul mee kos bespreeke en ik heurde van verschei'je boere dat ze, as dat mos ok van deurpakke wis.
Een keer tusse de middag zag ik heur met opgestreupte mouwe en d'r hoar in de war op et arf loope.
Zo, zei ze, hoe is't...? Ik heb net een kalf wat al een tijdje dood was aan honderd stukken uit een moederkoe gehaald, en dat stinkt man, ook al was je tien keer je handen, die stank krijg je voorlopig niet weg, eerst even wat eten nu, zal ik voor jou ook een broodje maken?
Doar kwam ik nie veur, ik was meer niesjiereg woarum ze veearts e' worre was, en of ze dat as kiend al wis, net as andere dêêretjes d'r van droome um verpleegster of stjoewardes te worre en hoe dat in die tied in z'n wark ging?
Je schrieft je in um veearts te worre. Wor je toe e'loate deele ze je in zei ze. Dat ging in die tied op: M/V. As V. wier je zoender veerder overleg in e'deeld bie de kleine huusdiere (gezelschapdiere) zei ze. Dat ging in die tied zo, mar dat was niet wat ze wou, dus dat ging niet deur!
Noe waare ze nie arg e'went an vrouwluu die veearts waare in et gebied woar zie warkte, en d'r waare boere die dat niet oender stoele of banke staaker.
Ik sprak ok minse die met oentzag zei'je dat je gezelleg een borrel met heur kos drinke mar dat je d'r niet oender tafel zeup.
Bie ziektes, as et kalve niet wou vlotte, of bie een epiedemie scheute sommege boere in de stress en wouwe dan een beer van een veearts met een tas vol apperetuur in z'n eeltege knuuste um et oenheil te keere.
Zo sting de boer bie een koe die mos kalve, mar dat ging niet goed, en as d'r niet gauw wat zou gebeure zou et kalf zeeker dood weeze.
En ja heur, in de staldeur verscheen Francien.
Heemeltsje lief, et is ok nog een wief, schold de boer z'n ooge ten hemel sloand.
De veearts die doadelek zag dat d'r gien tied te verspeule viel begos drekt an een keizersnee en binne de kortste keere lag d'r een leevend kalf in 't strooi.
bijdrage van Ap uut Appel
