Teegewooreg hoef je mar te Googele um een vekansiebestemming te viende, je vult een poar steekwoorde in zoas: Benidorm of Thailand en dan krieg je zoveul te verwarke da’k geliek stop met kieke
Vrogger was dat wel anders.
50 joar trug ging je noar een Reisburo um folders te hoale van een poar landde die je an e’roaje waare deur vriende of femielie die doar al e’weest waare, en dan rusteg thuus bekieke of dat wat veur joe was ,en, of et niet teveul in de pepiere liep.
In et begin van de joare zeuveteg kwam dat vaak neer op Spanje, woar je veur zowat etzelfde geld as met een caravan noar Limburg of de Ardenne kos, en dan ok nog met et vliegtuug.
In de joare vuufteg en zesteg was een vekansie met een vliegtuug nog veur de elite, et kwam nog in de krant of op de tilleviesie as d’r een bekende Nederlander met et vliegtuug noar Mallorca e’weest was.
Dat was nog in de tied dat Pedro Zaragoza Orts, as burgemeester van Benidorm, op z’n bromfiets van dat vissersdarp noar Madrid ree’j um doar z’n wilde planne met de regering te beproate
Dat lukte hoast té goed, Benidorm heet teegewooreg niet veur niks: Manhattan an de Middellandse zee, al zal die burgemeester weineg veurpret e’had he’n.
Eerst 9 uur op een bromfiets noar Madrid woar hie met Franco wou spreken over z’n plannen um van dat vissersdarpje een super vakantiestad te maake met veul hoogbouw, EN, woar vrouwe in Bikini op et strand mogge ligge.
Je snapt wel dat dat heel wat was in et zwoar Kathelieke Spanje van die tied.
Generaal Franco vun et een Super-idee en kwam zelf al gauw kieke.
Affijn:
Oendertusse sting et Reisburo je in die tied met road en doad bie, veur zoveer ze d’r verstand van hadde, want dat ging niet altied zoas et heurde, en zo is et heede ten daage nog.
We zaate een poar joar trug in et vliegtuug noar Tenerife met noast oens een oud vrouwtje die trots vertelde dat ze an et herstelle was van een heupoperatie. Bie et reisburo ha’n ze heur dit mooie eiland an e’roaje um elke dag flink te wandele.
Dat komt niet goed docht ik, op dat eiland loop je gien stap recht, een mins zoender heupoperoasie veult z’n spiere en botte de eerste week al, loat stoan zo’n oud minsje die net een operatie achter de rug had.
En dat klopte, ze het 3 weeke lang op et balkon noast oens zitte breije.
Wuullie wouwe begin joare 70 uut niesjieregheid ok wel es noar Spanje, wat neer kwam op d’r heen vliege, in de zon ligge, bruun worre, minse kieke, zwemme in de Middellandse zee en ’s avonds uutgoan en zuupe.
Van et land zaage we niks.
Et eerste wat ik doe as we d’r eenmoal bin is m’n koffer uutpakke en alles in en kast hange of lêêge, de vriend woar ik mee was had zo te zien nog gien zin in et uutpakke van z’n koffer, komt wel docht ik. Noa een dag of drie vreug ik mar es wanneer hie van plan was z’n koffer uut te pakke.
Niet dus, bin je mal, over een dag of tien goan we alweer op huus an.
De vekansie was heelemoal noar oenze zin e’weest, komme we doenkerbruun trug van Ibiza en ree’je eerst effe bie m’n ouwers an um te loate weete dat we d’r weer waare en te loate zien hoe mooi bruun we e’worre waare. De reactie was niet meteen wat we d’r van verwachtte.
Gut kienders wat zien juulie d’r uut, zo lillek bruun.
Moeder was nog uut de tied van zo blank meugelek en liefst met blosjes op de wange…
bijdrage van Ap uut Appel
Klik op de banner en ga naar “Kiezen voor Nijkerk
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
