Een poosje noa de tweede wereldoorlog had ik et geluk geboore te worre op de Noord-West Veluwe, tusse Niekark, Barreveld en Voorthuuze zo’n beetje, APPEL heet et doar.
Een soort Asterix en Obelix darpje (buurtschap) op et land woar et leeve nog goed was en vergeleeke met veul weerelsdsteeje nog goed is, en je kos je gien oenbezorgdere jeugd veursteelle as ik doar e’had het.
We waare d’r niet veul e’wend, d’r gebeurde gien weereldschokkende dinge en as d’r al es iets geks gebeurde had je doar de heele veerdere dag genog an.
Et begos lente te worre, veur oens jongeluu de tied um veul buute te vertoeve.
Mar niet alleen wuullie kiendere, ok de beeste en beestjes, peerde, koeie, pinke enzo wouwe net zo grêêg as wuullie de buutelucht in.
Van oens wier verwacht dat we oens verstand gebruukte en al waare we nog zo op’ewunne over de eerste lentedag we raakte niet zoas de beeste heelemoal deur et dolle heen.
In die tied begos ok op et platte land “tied is geld” te telle en kwam et in de mode um de veearts te loate komme um veural de jonge kalvere en pinke een soort kalmeringsspuit te geeve veur je ze de wei in stuurde, en dat waarkte as volgt:
Nog in de stal gaf je zo’n jong beest een spuitje met Xylazine, je wachtte een poosje tot et begos te waarke en brocht ze dan noar buute um ze veurzichteg an et zonlicht te loate wenne.
Mar de meeste boere ha’n in die tied wel meer te doen as veurzichteg hun kalfjes noar buute brenge en ha’n volges zêêge al veul beroerdere meniere uut e’prebeert zoas Pinke klem voere of Melasse/bierborstel voere, of twee pinke met hoores en poote an mekoar biende, zo dat ze et wel noaliete wild tejeer te goan.
Mar wa’k al zei, in die tied ha’n de meeste boere wel meer te doen as veurzichteg kalfjes noar buute begelei’je dus kwam et d’r vaak op neer dat ze noa zo’n spuitje een tik op de bille krege, de schuurdeur los e’zet wier en et hele spul noar buute e’jaagd.
Veur sommege beestjes was dat net te veul van et goeie en blie met een hele puls gras en veul zonlicht hielde ze zich niet an de afrastering van et weiland en vleuge as speulse hoende overal dwars deurheen zodat ze belandde in tuine van buure of arger.
Zo sting moeder buute achter de hooibarg net toe ik d’r an kwam um doar tusse de middag te goan eten.
In huus hield ze et niet meer uut oendanks een flinke griep en leunend op een stok stond ze achter de hooibarg in de eerste veurjoarszon war an te starke en vitamientjes op te doen toe ze inees hoefgetrappel noaderbie heurde komme en veur ze et in de goate had oog in oog sting met een schuumbekkend stiertsje die zoender de warking van z’n prikje of te wachtte noar buute e’runt was dwars deur hêêg en prikkeldroatvree heen.
Moeder, nog lemmer, licht in ’t heufd en zwak op de beentjes bleef van schrik stokstief stoan, et jonge stiertsje ok.
Een poar beroerde seconden leek et mar e’duurt te he’n, et overlêêg in moeders heufd en in de vervuulde harsus van et jonge stiertsje, toe kwam as vanzelf de verlossing zei moeder.
Net toe ze besleute had dat ze zou prebeere bie een oenverwachtse meneuvre van et stiertsje d’r eige met kloar geweld in de hooibarg te parse, zodat ie, as et tot een anval kwam veurbie zou schiete, sneuf et beestje angstanjagend diep en…..zakte deur z’n pootjes, et spuitje begon te warke en moeder was e’red.
Dat was de werelsschokkenste gebeurtenis van die dag in Appel en de lente was nog mar net begonne.
bijdrage van Ap uut Appel
Columnisten hebben de vrijheid hun mening te geven en hoeven zich niet te houden aan de journalistieke regels voor objectiviteit.
Het nieuws van nijkerk.nieuws.nl gemakkelijk volgen? Like dan ook onze Facebookpagina, volg ons op Twitter of LinkedIn en Instagram of krijg gratis onze dagelijkse of wekelijkse nieuwsbrief.
Adverteren op nijkerk.nieuws.nl neem dan contact op Leo Christiaens voor de prijzen en mogelijkheden. Zijn telefoonnummer: 06-11087527, zijn mailadres: [email protected]
