Verhoale in et Veluws dialect: Beetje vreemd
Op een symposium over liefdesrelaties heurde ik een psycholoog zêêge dat manne en vrouwe die makkelek verliefd worre, minder controle he'n over een bepoald stukje harsus dan de gemiddelde mins.
As je noe veerder leest is dat veur eige verantwoording, je kun je dr niet achter verschuule dat je d'r niks an kun doen, je moet je verstand blieve gebruuke of d'r niet an beginnen as je deur ervaring al weet hoe dat plekje in joe heufd waarkt.
In et veurste deel van je harsus schient een stee te zitte die de boel oender controle houdt zêêg mar.
Dat plekje waarkt niet bie iedereen eeve goed.
Volges die psycholoog he'n mannern doar eerder last van dan vrouwe as ze een lekker ding in 't viezier kriege en ze goan langer deur um iemand in bed te kriege.
Nou.....ik ken vrouwe die de manne vast versloan op dat gebied en et niet alleen bie flirte houwe. As je d'r eenmoal an begint is et eind zeuk en goa je vaak veerder.
As je saame woent of e'trouwd bin heet dat vreemdgoan.
As je d'r eenmoal an begint keu'j je vaak niet stoppe en wil je deurgoan tot een nog leuker of spannender wordt, of messchien keu'j je d'r niet meer mee stoppe deur dat plekje in je harsus.
Umdat et zo lekker goat wil je uutprebeere hoe et veult um nog veerder te goan. Et is net as bie vrie'je, as je d'r an begint waark je toch arges noartoe liekt me. Doar denkt iedereen ok weer anders over heurde ik van een vriendin die een minnoar had die zo slecht opscheut dat ze op een gegeeve moment zei: Ik goa slaape, maak me mar wakker as je kloarkomt.
Van flirten komt dus vreemdgoan, eigelek is et al een beetje vreemdgoan.
Elk land kiekt weer anders teege vreemdgoan an. Zo he'k altied begreepe dat et veur Italioane en Franse heel gewoon was dat je d'r een minnares op noa hield, as man dan, as die man mar flink huushoudgeld thuusbrengt zodat z'n gezin lekker deur kan leeve
An Belge denk ik niet meteen, net zomin as an Noore of Finne. Denk dat ik die niet warmbloedeg genog inschat?
Amerikoane maake dr een drama van, mar dat doen ze met veul meer dinge woar wuullie niet van opkieke. Zal wel met et geleuf te maake he'n, net as de Thaai makkelek een beetje vreemd goat, zomar tussedeur, as et zo uutkomt of de kans zich veur doet. Dat het ok met geleuf te maake. De meeste minse doar geleuve dat as et lekker is et goed is, en he'n gien last van schaamte of schuldgeveul as iedereen d'r mar van geniet.
En in oens landje, in oenze stad Niekark en umstreeke?
As kiend wier d'r an tavel wel es iets e'zeijd woar ik nieschiereg van wier. Ik geleuf niet dat mien ouwers et woord vreemdgoan gebruukte mar ik begreep wel dat die en die d'r met mekoar vandeur waare. Die waare goan drosse.
As ik loater op m'n kienderfietsje veurbie die boederie fietste woar zoiets roars gebeurd was snapte ik niet wie et in zn harsus hoalde dr met dat wilde ouwe wief vandeur te goan. Die boerin was toe begin darteg, ik een joar of tien.
En et kwam nie alleen bie boere veur.
Moeder vertelde, dat toe zie jong was minse op een landgoed bie hun in de buurt oenderling van wief e'ruild ha'n, d'r was ineens een andere kasteelvrouwe. Tot mien verboazing wier doar niet vreemd over e'doan, denk dat et eerlek verteld wier, dan krieg je gien geheime woar loater weer roare smoesjes van komme.
Doar was van te veure ok vast vreem e'goan liekt me, je goat niet zomer ruile zoender uut te prebeere.
Och, et komt overal veur, tot in de hoogste kringe. Oenze beste ouwe prins had ok meer hobby's dan we dochte.
Wat is dr veul over e schreeve en oenderzeuk noar e'doan. Wat veur de een vreemdgoan is is veur de ander mar een spelletje begriep ik as ik lees wat d'r allemoalover e'schreeve is. Tied um d'r een woordeboek bie te pakke en te kieke wat die d'r van zêêge: met een ander dan de vaste partner (incidenteel) seksuele omgang hebben stoat d'r, nou...dat zal veur de één ok wel weer een andere beteekenis he'n dan veur de ander.
Dat alleen manne vreemd goan liekt me ok niet kloppe, netuurlek goan d'r net zoveul vrouwe vreemd. As manne vreemd goan he'n ze doar toch een vrouw bie nodeg en andersum, al zit zo'n tien tot vuuftien percent d'r niet mee um met iemand van etzelfde geslacht vreemd te goan.
Is et dan wel vreemdgoan?
Tuurlek.
bijdrage van Ap uut Appel
