Verhoale in et Veluws dialect: De jeugd van teegeworeg
De schoole bin weer begonne, en dat mark je....
Och die lieve kiendertsjes op de kleuterschool (heet teegewooreg groep 1 en 2 geleuf ik) die verteedere je toch as je d'r op een ofstandje noar kiekt, alhoewel, et goat niet heelemoal zo lief as et liekt zie ik as de juf d'r een poar uut mekoar hoalt veur dat een van de twee straks een harsenschudding het. Dat kan nog wat worre...
Tot in de hoogste klas van de lêêgere school " zoas dat vrogger heette" is de jeugd nog oardeg in toom te houwe. Ze speule op et schoolplein, bin wies met wat ze leere en weete, ze doen braaf verkeersexame, steeke hun hand uut as ze van richting wille verandere, ze fietse NIET met z'n drieën of meer noast mekoar op et fietspad, en bin d'r nog wies mee dat ze et goed e'doan he'n....
Zitte ze eenmoal op vervolgoenderwies bin ze dat fietsexame totoal vergeete en maake zon keboal dat heure en zien je vergoat, en gebruuk je fietsbel niet as je d'r langs wil want dat wekt zoveul agressie op dat je veur je et weet een mes tusse je ribbe het, want et schient teegewooreg gewoon te weeze dat dat soort kiendere op z'n minst een mes of ander gereedschap meeneeme noar school.
Mar: "et kan ok anders"
Zo had ik zin in een frikandel met specioale saus en liep noar m'n favoriete snacbar um die te bestelle en een proatje te maake met de eigenoresse die fantastische sauze maakt en eige gemaakte Mayonaise had.
Zo'n snack wil ik grêêg buute op eete, een petatje of frikandel smaake lekkerder in de buutelucht, mar et reegende dus koos ik veur een rusteg tafeltsje bie et raam en wachtte tot m'n bestelling kloar was.
Achter in de zaak zat wat opgeschoote spul met veul keboal te eete en drinke.
Die kleintjes die net op een hoogere school zitte bin nog greun en temide mar de tweede en darde klassers veule d'r eige heel wat en het een lewaai as een oordeel, en daag ze niet uut deur lang noar ze te kieke want dan heur je al goaw: "he'k wat van je an opa"?
Plotseling waare ze kloar met eete en drinke
Tot m'n verboazing stinge ze zowat allemoal tegeliek op, gooide de zakjes, bakjes en blikjes keureg in de vullesbak, liepe langs de bar noar buute en zei'je teege de eigenoaresse: het was weer heerlijk mevrouw, nog een fijne dag en tot de volgende keer.
He't m'n duum op'esteuke en ze zeije niet eens: bemeuij je d'r nie mee opa...
Och, zolang d'r dit soort jeugd is komt et vast wel goed.
