Verhoale in et veluws dialect: Zorge? gien zorge

De kiendere he'n et bedocht, as et an mien e'leege had was et mooi blieve zitte zo,

zei de ouwe boerin toe ze me met plaktafel en behanggereedschap binne liet

Inderdoad, die kiendere hadde al weeke e'leeje de heele boel e'regeld en of e'spreuke, vandaag zou ik de heert van die groote ouwe boederie behange. Ok ha'n de kiendere bedocht dat moeder, die teege de neegeteg was, doar zo min meugelek last van mocht he'n.

Dat was goed bedocht allemoal, mar ik was d'r nog niet zo zeeker van dat et goed zou komme, ik kende die moeder langer dan vandaag, een "strabant" typje.

Noadat ik de plaktafel uut e'klapt had, een flinke emmer plaksel e'maakt en begon met de lange boane knippe kwam de oudste dêêre d'r in, die, zoas af e'proat was, opoe zou "ofvoere" zodat ze veerder gien last zou he'n en ik niet van heur.

Mar dat ging niet vanzelf an et gekwiest achter mien rug te heure d'r mos toch iemand weeze um veur koffie en zo te zorge, en zwoardere argumente wiere an e'voerd deur opoe um d'r bie te kunnen blieve.

Ze liet d'r eige zo'n dag woarop ze iemand veur d'r eige alleen had en woarmee ze de heele dag kon proate niet zomar ofpakke.

Ik mos die dêêre mar es een beetje helpe en zei dat ik mezelf best zou redde met koffie en zo dus niks um je zorge over te maake.

Noa veul vuuve en zesse kreeg heur dochter d'r dan toch mee in de kloarstoande auto veur een dagje uut.

Umda'k d'r een beetje een noar geveul bie had en de boel wat wou susse leup ik mee noar de geutdeur en prebeerde nog iets opbeurends te zêêge zoas, maak je noe mar gien zorge minsje en geniet d'r mar van vandaag, as je vanavend thuus komt is de heele heert behange, dus gien zorge maake veerder.

Fel dreij'de ze d'r eige um en zei Ik me zorge maake, woar zou ik me zorge veur maake jong? Doar bin ik veuls te oud veur e'worre.

Te oud veur e'worre? vreug ik beduusd. Inderdoad ja, te oud veur e'worre.

Ik het me vrogger over zooveul dinge zorge e'maakt wat achterof narges veur nodeg was dat ik doar niet meer an begin.