Verhoale in et Veluws dialect: Altied wat
De eerste keer trouw je uit liefde
De tweede keer voor 't geld
De derde keer voor 't gezelschap
Dat was een uutspraak van Jacqueline Lee Bouvier, loater beeter bekend as Jacky Kennedy umdat ze op 12 september 1953 trouwde met John Fitsgerald Kennedy.
Toe zie (Jacky Kennedy) in 1968 veur de tweede keer trouwde met de schatrieke Aristoteles Onassis begreep ik dat ze d'r eige Mantra goed noa-leefde, mar et kan ok best weeze dat ze die uutspraake pas loater e'doan het, in ieder geval zat ze veur et geld die tweede keer nie verkeerd.
Ok ik was "noa joare alleen e'weest te he'n" an de tweede keer toe, toe ik iemand teegekwam woar et oardeg mee "klikte," en had veur mezelf besleute da'k et wel weer an-durfde overnieuw te beginne, dus doar had ik Jans niet echt veur noodeg, mar ik wou toch grêêg heure hoe zie d'r over docht.
Jans was een "deur ervaring wies e'worre" vroggere buurvrouw woar ik deur de joare heen contact mee e'houwe had, en as ik in de buurt van Niekark was ging ik grêêg effe bie heur an um heur wieze woorde en uutspraake te heure.
Veur zoveer ik weet was ze d'r heele leeve alleen e' weest en bie d'r ouwers blieve woene, en had ze allebei "zoas dat heet" an 't eind e'brocht, en noe zat ze doar dus alleen op der boederie. Mar je mos niet denke dat ze op viziete zat te wachtte want je mos biekans een ofspraak maake wou je d'r alleen treffe.
Bliekboar was ze een geliefd object veur veul minse die net as ik um wieze road kwaame vraage.
Et was gezelleg as altied, en noa we et over de nieuwtjes uut de buurt e'had ha'n , over vrogger "veur zoveer ik doar over mee kon proate'', over de zoemer, seks en vliegende schuttels, docht ik nog es, moe'k dat noe eigelek wel an heur vraage? zo'n mins wat zelf nooit e'trouwd e'weest is?
Mar ze had heur antwoord kloar.
Eerlek zêêge Jans, wat vien jie d'r van, alleen is mar alleen of niet dan?
Jong, ik gun et je van harte, mar weet woar je an begin, je he'n et zo goed noe, je woent doar hardstikke leuk en as ik et goed begriep moet je dan ok nog heelemoal noar Groningen verhuuze, je kent doar niemand, en as et niet wil zit je doar alleen te kieke.
Ik zêêg altied mar:
As je alleen bin is et wel es wat, mar as je met z'n twee'je bin is et ALTIED wat...
bijdrage van Ap uut Appel
